"Det ekstatiske spisebordet utfyller nøyaktig sin plass i rommet", skriv Helge Torvund i samlinga «Alt er høy» og set tilværet i magisk samanheng. Ein magi eg møtte fyrste gong i 2014 då eg vart bedt om å lesa Torvunddikt til den veldige Monosapiens-musikken. Ein "stor og rullesteinsforma musikk handsama av kjærleiken sine fingrar" fødd og oppvaksen i ein låve på Ogna. Eg tenkte, medan bass, trompet, trekkspel, trommer og gitarar forsøkte å skubba meg av scenen, at det hadde vore fint å ta Helge sin poesi til ein stille stad. La den synga sin eigen song. "Vera stille som jordbær når regnet fell på ettermiddagslauv”. Tiåret som har gått sidan Monosapiens vart "ein skulptur av minne" har vore hektisk og spanande. Men plutseleg var ideen moden og ville ut.

"Med ein kjærleik større enn stareflokkar" er ein time med mine favorittar. Ei hyllest til poesien, undringa, stilla og smilet.

PS. Monosapiens finst på Youtube.

Ivar Nygaard er 64 år, kulturhistorikar, forteljar og biletkunstnar. Meir på www.ivarnygaard.no